مركز المساعدة
اضغط على أي سؤال علشان تفتح الإجابة.
إزاي أجيب ستيكر وأطبعه؟
الموضوع كله بياخد دقيقتين، وببلاش.
- ادخل بحساب جوجل — من غير كود ولا انتظار.
- ضيف عربيتك واديها اسم تعرفها بيه، زي «اللانسر». رقم اللوحة مش مطلوب خالص.
- من صفحة العربية اضغط «نزّل الستيكر جاهز للطباعة (PDF)».
- اطبعه والزقه على الإزاز الأمامي أو الخلفي بحيث الكود يبان من برّه.
الملف فيه نسخة عادية ونسخة معكوسة، علشان تقدر تلزقه من جوه الإزاز برضه.
إزاي ألزق ستيكر الفينيل (مطفي أو لامع)؟
بيتلزق من برّه، على العربية أو الإزاز. اختار مكان الكود يبان فيه كويس.
- نضّف المكان بكحول ونشّفه بفوطة مايكروفايبر — المناديل الورق بتسيب وبر.
- الزقه في الضل والسطح مش سخن. على صاج أو إزاز سخن الغرا بيمسك قبل ما تطلّع الفقاقيع.
- شيل جزء صغير من الورقة اللي ورا، وثبّت الطرف.
- كمّل شيل الورقة وانت بتفرد من النص لبرّه بكارت أو بإيدك.
- اضغط على الأطراف كويس.
- سيبه 48 ساعة: من غير غسيل، ولو على الإزاز من غير مسّاحات عليه.
- صوّر الكود بموبايل تاني واتأكد إنه بيفتح صفحتك.
لو المكان عليه فيلم فاميه، الزقه على الصاج أو على جزء إزاز مفيهوش فيلم.
إزاي ألزق الستيكر الشفاف من جوّه الإزاز؟
ده بيتلزق من جوّه العربية والرسمة بتتقري من برّه. ينفع على الإزاز الأمامي أو الخلفي.
- قبل ما تلزقه: حط ورقة الطلب اللي في الظرف على الإزاز من جوّه والكود اللي عليها ناحية برّه، واقف برّه وصوّرها. لو الصفحة فتحت، يبقى الإزاز ده مش هيمنع الكود.
- لو الإزاز عليه فيلم فاميه، ما تلزقوش على الفيلم — لما تشيله بعدين الفيلم بيتقطع معاه. اختار جزء من غير فيلم.
- نضّف الإزاز من جوّه بكحول ونشّفه بفوطة مايكروفايبر.
- الزقه والإزاز مش سخن — مش والعربية واقفة في الشمس.
- الطبقة الشفافة بتشد التراب أول ما تشيلها. شيلها وانت جنب الإزاز والزقه على طول.
- الوش اللي فيه الغرا يروح على الإزاز. ابدأ من النص لبرّه عشان مايبقاش فيه فقاقيع.
- سيبه 48 ساعة من غير ما تمسح الإزاز من جوّه عليه.
- اقف برّه وصوّر الكود تاني واتأكد إنه بيفتح صفحتك.
من جوّه العربية هتشوف ضهره أبيض، والرسمة بتبان صح من برّه — ده مقصود.
مسحت كود على عربية — إيه اللي بيحصل؟
لو انت الواقف قدام العربية: مفيش تسجيل، ومفيش أي حاجة تتحمّل.
- بتفتح لك صفحة فيها رسايل جاهزة — اختار اللي بيوصف الموقف: قافلة عليا، النور شغال، هتتشال بالونش، وغيرها.
- صاحب العربية بيوصله التنبيه على طول، من غير ما يعرف مين انت ولا رقمك. ومش هيعرف اسمك ولا رقمك إلا لو انت كتبتهم بنفسك مع الرسالة.
- سيب الصفحة مفتوحة — لو رد عليك، زي «جاي حالاً»، الرد بيظهر في نفس الصفحة.
رقمه مش بيبان ليك أبدًا، ورقمك مش بيوصله غير لو انت كتبته بنفسك. والصفحة بتنتهي لوحدها بعد ساعة.
التنبيهات مش بتوصلني
غالبًا واحدة من التلاتة دول:
- الإشعارات لسه مش مفعّلة على الجهاز: افتح الإعدادات واضغط «فعّل الإشعارات»، ولازم تسمح للمتصفح بيها لما يسألك.
- ساعات الهدوء شغالة: من 10 بالليل لحد 6 الصبح مفيش إشعار، غير التنبيه المستعجل. التنبيه بيفضل موجود في قايمة التنبيهات وتشوفه أول ما تفتح.
- نوع الرسالة متكتّم: في الإعدادات فيه قايمة «تنبيهات من غير إشعار» — اتأكد إن النوع اللي بتستناه مش متعلّم عليه.
الإشعار على الموبايل هو الطريقة الوحيدة اللي التنبيه بيوصلك بيها وانت بره التطبيق، فخلّي التنبيهات مفعّلة على جهاز واحد على الأقل. وأي تنبيه ما وصلكش بيفضل مستنيك في قايمة التنبيهات.
وضع السفر — إزاي أوقف الستيكرات؟
مسافر، أو مش عايز حد يوصلك فترة؟
- من الإعدادات اضغط «أوقف كل الستيكرات» — كل عربياتك بتقف مرة واحدة.
- اللي يصوّر الكود هيلاقي صفحة عادية من غير أي بيانات، ومش هيعرف يبعتلك حاجة.
- لما ترجع اضغط «رجّع كل الستيكرات تشتغل» — بنفس الستيكر المطبوع، مش محتاج تطبع تاني.
لو عايز توقف عربية واحدة بس، اعملها من صفحة العربية نفسها.
الخصوصية وبياناتي
أقل بيانات ممكنة، ومحدش بيشوف رقم حد إلا لو هو نفسه كتبه.
- اللي بنخزنه: إيميل حساب جوجل اللي بتدخل بيه، اسم عربيتك، والتنبيهات اللي وصلتلك — واسمك لو انت كتبته في الإعدادات. ولو حسابك القديم كان مفتوح برقم موبايل، الرقم ده متخزن مشفّر. ورقم التواصل لو كتبته، متخزن مشفّر.
- اللي ما بيظهرش لحد إلا لو إنت شغّلته: اسمك ورقمك ورقم اللوحة. صفحة المسح مفيهاش أي بيانات عنك غير اللي إنت شغّلته.
- فيه حاجتين بس عنك تقدر تظهّرهم بنفسك، والاتنين مقفولين من الأول: «اعرض آخر رقمين من اللوحة» علشان اللي بيصوّر يتأكد إنها عربيتك، و«كارت التعريف» لو حابب تعرض اسمك أو شغلك أو رقم للتواصل على صفحة الكود.
- امسح حسابك في أي وقت من الإعدادات: بيتشال كل حاجة، والتنبيهات القديمة بتتفصل عنك.
- لو طلبت ستيكر مطبوع وعلّمت على «احفظ البيانات دي للطلب الجاي»، بنحفظ اسمك ورقمك والمحافظة والعنوان مشفّرين في حسابك عشان طلبك الجاي يبقى أسرع. بيفضلوا لحد ما تمسحهم من الإعدادات أو تمسح حسابك.
بنجمع أقل بيانات ممكنة ونديك حق تمسحها كلها ساعة ما تحب — زي ما بيقول قانون حماية البيانات الشخصية المصري.
الستيكر اتقطع أو عايز واحد جديد
فيه طريقتين، وكل واحدة ليها حالتها:
- الستيكر باهت أو اتقطع: نزّل الملف تاني من صفحة العربية واطبعه. نفس الكود، وكل حاجة بتفضل زي ما هي.
- حد بيضايقك أو الكود وصل لحد مش عايزه: اضغط «غيّر الكود» من صفحة العربية — الكود القديم بيبطل خالص ولازم تطبع الستيكر الجديد.
لو بعت العربية، غيّر الكود قبل ما تسلّمها.
إزاي أرجّع ستيكر مطبوع؟
الترجيع ببلاش، وفي أي وقت.
- افتح الطلب من «طلباتك» واضغط «كلّمنا على واتساب»، أو ابعتلنا على support@klaksapp.com.
- قولنا أنهي ستيكر، ونتفق معاك على ميعاد نيجي ناخده منك.
- الترجيع مش هيكلّفك حاجة، ونرجّعلك اللي دفعته في الستيكر.
لو طبعت الستيكر بنفسك من «ملف الطباعة»، ده ببلاش أصلًا ومفيش حاجة ترجّعها.
بنضيف أسئلة جديدة هنا أول بأول.